ខេត្តព្រះសីហនុ៖ រកឃើញដើមហេតុជីដូនវ័យ ៩៣ឆ្នាំមួយរូបផ្ទះនៅម្តុំឈូកវ៉ាភ្នំពេញ មកដល់ខេត្តព្រះសីហនុតាមឡានឈ្នួលកាលពីយប់ថ្ងៃទី០៥ ខែកុម្ភៈ ឆ្នាំ២០២៣ គឺមានបំណងស្វែងរកដំណោះស្រាយវិវាទរឿងដីធ្លីក្នុងក្រុមគ្រួសារពីមុន មិនមែនវង្វេងផ្ទះឬកូនចៅបោះបង់ចោលទេ។
នេះជាការលើកឡើងរបស់ជីដូនជម្រាបជូនអភិបាលខេត្តព្រះសីហនុ លោក គួច ចំរើន ក្នុងពេលដែលលោកជួបសួរសុខទុក្ខនិងឧបត្ថម្ភថវិកា ម្ហូបអាហារមួយចំនួនជូនជីដូនរូបនេះដែលអាជ្ញាធររៀបចំឲ្យស្នាក់នៅ មើលថែបណ្តោះអាសន្ននៅបុរីកុមារកំព្រាខេត្តព្រះសីហនុ នាថ្ងៃត្រង់ ថ្ងៃទី៩ ខែកុម្ភៈ ឆ្នាំ២០២៣។
ជាមួយគ្នានេះ តាមរយៈការសម្របសម្រួលពីអភិបាលខេត្តព្រះសីហនុ ជីដូនរូបនេះបានយល់ព្រមត្រឡប់ទៅផ្ទះនៅម្តុំឈូកវ៉ា ភ្នំពេញវិញហើយ ចំណែករឿងវិវាទផ្ទាល់ខ្លួនជីដូនពាក់ពន្ធ័ដីធ្លីយ៉ាងណានោះ នឹងបន្តដោះស្រាយតាមក្រោយដោយផ្អែកលើនិតិវិធីច្បាប់ ក្នុងនោះរដ្ឋបាលខេត្តនឹងចាត់ចែងមន្ត្រីរៀបចំដឹកជញ្ជូនលោកយាយទៅដល់ផ្ទះ៕
